Sulitilluni ajoqusernerit

Sillimmasiissut pillugu

Sulitilluni ajoqusernerni immikkoortut pingaarnerit marluupput:

• Sulitilluni ajutoornerit
• Sulineq peqqutigalugu napparsimalernerit

Ajoquserneq timikkut tarnikkulluunniit ajoquserneruvoq, pisoqarnerani imaluunniit sunniisoqarnerani tassanngaannartumik imaluunniit ullut tallimat ingerlanerini pisoq. Assersuutigalugu inussavit ilaat maskiinamik kipisoorukku.

Sulineq peqqutigalugu napparsimalerneq sulinermik imaluunniit sullivimmi pissutsinik peqquteqartarpoq. Napparsimalerneq piffissap sivikitsup sivisunerusulluunniit ingerlanerani takkussinnaavoq. Assersuutigalugu ukiuni arlalinni nipiliorfiusunik avatangiiseqarlutit suliguit tusillarsinnaavutit.

Sulitilluni ajutoorneq

Namminersorlutik Oqartussani sulininnut atatillugu ajoquseruit, tamanna sulitilluni ajoqusernertut nalunaarutigissavat.

Sulitilluni ajoqusersinnaanermut sillimmasiissuterput taamaallaat Namminersorlutik Oqartussani sulitillutit ajoqusernernut matussutaasinnaavoq. Taamaattumik sunngiffinni ajoqusernerit matussuserneqarneq AJORPUT. Tamanna pissutigalugu suliartorninniit soraarnissavit tungaanut sulitilluni ajoqusersinnaanermut sillimmasiissutitsinnit matussuserneqarsinnaavutit.

Sulitilluni ajutoornermi timikkut taamatullu tarnikkut ajoqusernerit matussuserneqartarput. Tamatuma saniatigut sulitillutit isarussatit aserorpata, isarussanut akiliunneqarsinnaavutit, tassanili akinut killigititaasut arlaqarput.

EQQAAMAJUK – sulitillutit ajoquseruit aamma namminerisamik imaluunniit ataatsimoortumik ajoqusersinnaanermut sillimmasiissummit matussusiivigineqarsinnaagavit. Taamaattumik nammineerlutit sillimmasiisarfiit attaveqarfigissavat.

Sulineq peqqutigalugu napparsimalerneq

Namminersorlutik Oqartussani suliatit peqqutigalugit napparsimaleruit, tamanna suliatut www.anmeld.gl aqqutigalugu nalunaarutigissavat.

Napparsimanerit nappaatitut atuutiinnartutut, Namminersorlutik Oqartussani sulinerpit malitsigisaanik pilersimasutut nassuiarneqarput.

Namminersorlutik Oqartussani sulininni sulineq peqqutigalugu napparsimalersimanissat pasitsaakkukku, ajoqusernermik nalunaaruteqannginninni nammineerlutit nakorsarisat attaveqarfigissavat. Eqqaamallugu, nakorsannut ilisimatitssissutigissagakku sulinermik peqquterarunartumik napparsimalersimanissat ilimagigakku, napparsimalersimanerlu ajoqusernertut nalunaarutiginissaanik kissaatigalugu. Taamaalillutit ajoqusernermik nalunaaruteqarnissamut uppernarsaatissat pisariaqartut pissarsiarissavatit.

Uani annertunerusumik paasisaqarsinnaavutit: http://www.cfa.gl/kl-GL.aspx?sc_lang=da

Sillimmasiissummit nalinginnaasumik matussuserneqartarput:

• Sulitilluni ajoqusersinnaanermut sillimmasiissut sulitilluni ajutoornernut aamma sulineq peqqutigalugu napparsimanernut matussutaasarpoq.
• Sulitilluni ajutoorneq inummik ajoqusiinerusarpoq, ajoquserneq timikkut tarnikkulluunniit ajoquserneruvoq, pisoqarnerani imaluunniit sunniisoqarnerani tassanngaannartumik imaluunniit ullut tallimat ingerlanerini pisoq.
• Sulineq peqqutigalugu napparsimalerneq tassaavoq nappaat imaluunniit erloqissut, sulinermik imaluunniit sullivimmi pissutsinik peqquteqartoq.
• Piffissami suliffiusumi sulisut sullivimmut apuunneriniit qimagunnissaasa tungaanut matussusiisinnaavoq.
• Sullivimmut atatillugu angalanerni sulitilluni ajoqusernerit piffissat ilaat ilanngunnagit matussutaasarpoq.
• Isarussat ajoquserneri aningaasatigut arlalinnik killeqartitsiviullutik matussuserneqarsinnaapput.
  
  

Sillimmasiissummit matussuserneqartanngillat: 

• Inuk sullivimminut sullivimminiillu angallanneqarnermini ajoquserpat, nalinginnaasumik ajoquserneq sullivimmi ajoqusernertut akuerineqarneq ajorpoq, sulisitsisoq angallanneqarnermut sunniisinnaanngimmat
• Kisiannili pisut ilaanni sullivimmut sullivimmiillu angallanneqarneq sulisitsisup soqutigisarisinnaavaa, taamaattoqassappallu ajoquserneq sulitilluni ajoqusernertut akuerineqarsinnaavoq
  
  

Ajoqusiinermik imaaliorlutit nalunaaruteqassaatit

• Isarussat ajoquserneri pillugit nalunaarut uunga nassiunneqassaaq: Sedgwick Leif Hansen, arbejdsskade@slhdk.dk
• Immersugassaq Isarussat ajoquserneri immersoruk

Sulitilluni ajutoornerit allat imaluunniit sulineq peqqutigalugu napparsimalerneq www.anmeld.gl aqqutigalugu nalunaarutigineqassapput.